Ауруханаларға отандық өндірістегі көліктер мен аппараттар жеткізіледі

Осы жылдың қараша айына дейін елдегі ауруханалар мен емханалар үшін мыңнан аса отандық өндірістегі жедел жәрдем көлігі сатылып алынады. Бұл туралы Денсаулық сақтау министрі Алексей Цой хабарлады.
– Біздің министрлік күзгі кезеңге барынша дайындық жұмыстарын жүргізіп жатыр. Елдегі ауруханалардағы төсек орындардың саны 54 178-ке жетеді. Инфекциялық және провизорлық стационарларда өкпені жасанды желдетудің 3 379 аппараты бар. Қосымша тағы 2 619 аппарат сатып аламыз. Оның ішінде 1 500 аппарат отандық компанияларда өндірілген. Ал жедел жәрдем қызметі туралы айтар болсақ, 2020 жылы отандық өндірістегі 1 167 дана санитариялық автокөлікті сатып алу көзделіп отыр. Олардың бәрі де осы жылдың қараша айына дейін ауруханаларға жеткізіледі, – деді министр Үкімет отырысында.