Биыл мемлекеттік бюджетке 5,5 трлн. теңге кіріс түскен

Жыл басынан бері мемлекеттік бюджетке 5,5 трлн. теңге кіріс түсті. Бұл туралы ҚР Қаржы министрі Ерұлан Жамаубаев Үкімет отырысындағы баяндамасында айтты.
– 8 айдың қорытындысы бойынша мемлекеттік бюджетке 5,5 трлн. теңге сомасында кіріс түсті немесе жоспар 95,5% атқарылды. Республикалық бюджетке 3 трлн. 455 млрд теңге түсті немесе жоспар 85% атқарылды. Кіріс бойынша жоспардың атқарылмауы 610 млрд. теңгені құрады. Негізгі атқарылмау сомалары қосылған құн салығы және корпоративтік табыс салығына тиесілі, – деді министр.
Оның айтуынша, корпоративтік табыс салығының атқарылмауына бірнеше фактор әсер етті. Олар: негізгі экспорттық позициялар бойынша бағаның орта есеппен 14,4%-ға құлдырауы; 854 ірі салық төлеуші бойынша мәлімделген аванстық төлемдер сомасының өткен жылдың 8 айымен салыстырғанда 229,2 млрд. теңгеге төмендеуі және екінші деңгейлі банктер түсімінің 9 млрд. теңгеге азаюы.