Қазақстандық вакцина осы айда сыналады
Қыркүйек айының ішінде ҚР Білім және ғылым министрлігіне қарасты Биологиялық қауіпсіздік мәселелері ғылыми-зерттеу институты ғалымдары әзірлеген вакцина 244 еріктіге салынады. Бұл туралы ҚазАқпарат хабарлады.
Аталған институттың Facebook парақшасында жарияланған ақпаратта 2020 жылдың қыркүйегінде 244 еріктіге вакцинаны клиникалық сынау басталатыны жазылған. Оның ішінде 44 ерікті вакцинаны клиникалық сынақтың бірінші фазасында, ал қалғандары екінші фазасында алады.
Естеріңізге сала кетсек, Дүниежүзілік денсаулық сақтау ұйымы (ДСҰ) ҚР БҒМ Биологиялық қауіпсіздік мәселелері ғылыми-зерттеу институты жасап шығарған екпені ресми түрде клиникалық сынақтарға жіберілген вакциналар тізіміне қосты.
Дүниежүзілік денсаулық сақтау ұйымының клиникалық сынаққа жіберілген вакциналар тізіміне Ұлыбритания, Қытай, Ресей, АҚШ, Германия, Жапония, Үндістан, Оңтүстік Корея, Бельгия, Швеция, Сингапур, Италия, Аустралия, Тайвань, Куба, Франция, Аустрия және Канада секілді елдердің компаниялары немесе зерттеу институттары жасап шығарған 33 вакцина кірген.
