Емханаға «Qoldau 24/7» қосымшасы арқылы тіркелесіз
Емханаға өз еркімен тіркелу құқығы жылына бір рет қана беріледі. Тіркелу туралы толық ақпаратты телефонға «Qoldau 24/7» қосымшасын жүктеу арқылы білуге болады.
Бұл туралы Атырау облыстық денсаулық сақтау басқармасының баспасөз қызметі хабарлады.
⠀
– Елдегі эпидемиологиялық жағдайға байланысты Президенттің тікелей тапсырмасымен осы жылдың шілде, тамыз, қыркүйек айларында МӘМС қорына жарна төлеуден босатылған шағын және орта кәсіпкерліктің 29 санатына жататын кәсіпкерлер медицина қызметін тегін пайдалана алады.
Кәсіпорын басшылары ол үшін өз қызметкерлерінің тізімін электронды форматта әр айдың 25-інен кешіктірмей ұсынуы тиіс. Өткен жылы тіркелген емханадан ауысқысы келмейтін тұрғындарға ешқайда барудың қажеті жоқ. Олар сол емханада автоматты түрде тіркеліп тұрады. Түсінбеген сауалдарын смартфонға «Qoldau 24/7» қосымшасын жүктеп алу арқылы немесе 1406 нөміріне электронды жазба жіберу арқылы қалдыруға болады, – деді «Әлеуметтік медициналық сақтандыру қоры» коммерциялық емес акционерлік қоғамы Атырау облысы бойынша филиалының директоры Сәбит Құралбек.
⠀
Тұрғындардың өз таңдауымен емханаға тіркелу мерзімі жыл сайын 15 қыркүйек пен 15 қараша аралығында өтеді.
