Әлем - Жаңалықтар - 24.09.2023

Украина қарулы күштері қарсы шабуылды үдетті

24.09.2023

Украина қарулы күштерінің Ресей аннексиялап алған Қырымдағы Қара теңіз флоты бас штабына жасаған шабуылынан соң арада бір күн өтпей жатып тағы да жарылыстар болды. Басқыншылардың қолына өткен Севастополь қаласының басшысы Михаил Развожаевтың айтуынша, қалаға атылған зымырандардың беті оңай қайтарылған.

Ал Украина қорғаныс министрлігіне қарасты барлау басқармасының бастығы Кирилл Буданов жұма күнгі шабуылдан, кем дегенде, тоғыз адам жер жастанғанын хабарлады. Сондай-ақ, жараланғандардың ішінде ресейлік генералдар да бар көрінеді. Бірақ бұл мәліметтер ресми түрде растала қоймады.

Соғысты сараптау институтының бағалауы бойынша Украина сарбаздарының қарсы шабуылы елдің оңтүстігі мен шығысында ерекше байқалған. Тіпті, Запорожье облысында УҚК бронотехникалары Ресей қорғанысының соңғы шебін талқандауға көшкен. Дегенмен соғыс өрті өршіп тұрған аймақтарда орыс жауынгерлері атқан оқтан бейбіт тұрғындардың да қаза табу деректері жиі тіркеліп жатыр деген мәлімет бар.