Білім саласының үздіктері марапатталды

26-тамыз күні Атырау облысында өткен білім беру қызметкерлерінің Тамыз кеңесінде білім саласына еңбегі сіңген бір топ мұғалім «ҚР Білім беру ісінің құрметті қызметкері» және «Ыбырай Алтынсарин» төсбелгісімен марапатталды. Бұл туралы Атырау облыстық Білім беру басқармасының баспасөз қызметі хабарлады.

Үздік ұстаздарды арнайы төсбелгімен Атырау облысының әкімі Махамбет Досмұхамбетов марапаттады. Мұғалімдерді жаңа оқу жылының басталуымен құттықтаған өңір басшысы пандемия туындатқан қиындықтарға қарамастан білімді ұрпақ тәрбиелеуде ерен еңбек еткен ұстаздарға алғысын білдірді.

— Пандемия білім беру саласына да өз әсерін тигізді. Қашықтан оқыту жүйесін шұғыл меңгеріп, заманның жаңа талаптарын жедел үйрендіңіздер. Сол үшін Сіздерге алғысымды білдіремін, — деді облыс әкімі.

Аталған жиында «ҚР Білім беру ісінің құрметті қызметкері» төсбелгісімен Гүлжан Нұргожина, Лилия Лигай, Алуа Тілеубергенова, Күлімжан Сүтәлиева марапатталса, «Ыбырай Алтынсарин» төсбелгісі Луиза Гумарова, Майра Сабирова, Жұмаш Тілепова мен Ізтұрған Тасбаевтың кеудесінде тағылды.