Биыл «Цифрлық нотариат» жобасы іске қосылды
Биыл сәуір айында ҚР Әділет министрлігінде нотариалды куәландыратын сенімхаттарды қашықтықтан беруге арналған «Цифрлық нотариат» жобасының тұсаукесері өткен еді. Бұл туралы Атырау облысы Әділет департаменті басшысының орынбасары Күланда Қыстаубаева мәлім етті, деп хабарлайды Өңірлік коммуникациялар қызметі.
Әділет министрлігі мен Цифрлық даму, инновациялар және аэроғарыш өнеркәсібі «Цифрлық нотариат пилоттық жобасын іске қосу туралы» бірлескен бұйрыққа қол қойды. Осыған орай қазіргі заман талабына сай азаматтар сенімхаттарды нотариуспен бейнебайланыс арқылы онлайн режимінде бере алады.
— Ендігі кезекте сенімхат беретін азамат нотариустың кеңсесіне бармай-ақ, «Мобильді үкімет» ақпараттық жүйесінде немесе «Бірыңғай нотариаттық ақпараттық жүйе» жүйесінде авторизациядан өтіп, өзіне қажетті сенімхатты бере алады. Бұл пилоттық жоба болғандықтан, сондай-ақ нотариустардың қызметіне жаңадан енгізіліп жатқандықтан біраз қиындық туғызуы мүмкін, — деді Г.Қыстаубаева.
Сонымен қатар мұны жүзеге асыру кезең-кезеңмен жүргізілетіні жоспарланып отыр.
— Алғашқы кезеңде сенімхаттардың тек қана бірнеше түрі куәландырылады. Соның ішінде соттарда істерді жүргізуге және нотариуста мұрагерлік істерді ашып жүргізуге берілетін сенімхат, сондай-ақ Қазақстан Республикасының барлық мемлекеттік органында және басқа да құзыретті органдарында, т.б. өкілеттік етуге берілетін сенімхаттар куәландырылатын болады. Өтінішті берген кезде Қазақстан Республикасы азаматы кез-келген нотариусты таңдауына мүмкіндігі бар, — деді ол.
