Құрманғазы ауданында Батыс аймақтық ақындар айтысы өтеді
23 қазан күні Құрманғазы ауданының орталығындағы С.Көшекбаев атындағы мәдениет үйінде Атырау облыстық мәдениет және тілдерді дамыту басқармасы және Құрманғазы ауданы әкімдігінің ұйымдастыруымен Құрманғазы ауданының 95 жылдық мерейтойына арналған «Қасиетіңнен айналайын, Құрманғазым!» атты Батыс аймақтық ақындар айтысы өтеді.
Жыр додасында еліміздің батыс аймақтары мен облыс аудандарынан таңдалынып алынған 8 ақын бақ сынамақ. Атап айтсақ, Айнабек Бейсенғалиев (БҚО), Жанболат Әлиев (Маңғыстау облысы), Самар Орынбай (Ақтөбе облысы), Серікбол Панабердиев (Атырау қаласы), Серік Қойшығұлов (Махамбет ауданы), Нұрбейбіт Нұғыманов (Құрманғазы ауданы), Нұрболат Нұғманов (Исатай ауданы), Салауат Кәрімұлы (Қызылқоға ауданы). Жыр жәрмеңкесінің жүргізушісі ҚР мәдениет саласының үздігі, айтыскер ақын Шалқарбай Ізбасаров. Ал қазылар алғасының төрағасы, белгілі ақын Мүтиғолла Ғани болмақ.
— Халқымыздың көнеден жеткен бекзат өнері айтыс арқылы ана тіліміздің құдіретін паш ету – міндет. Сондай-ақ, ұлттық болмыс пен отансүйгіштік рухты көтере отырып, өскелең ұрпақтың өлең-жырға құштарлығын оятып, күй атасы Құрманғазының есімі берілген ауданның 95 жыл мерейтойын атап өту – басты мақсат,- деді С.Көшекбаев атындағы аудандық мәдениет үйінің директоры Жалғас Сағындықов.
Айта кетейік, жыр додасың үздігіне 500 000 теңге ақшалай жүлде беріледі. Жалпы ақындар айтысы 2 млн. 838 мың теңге қаржыға ұйымдастырылып отыр.
