Атырауда жылына 30 млн. маска шығарылмақ

Атырауда «Доктор Хаус» ЖШС медициналық бетперделер тіге бастады. Бұл туралы облыстық денсаулық сақтау басқармасының баспасөз қызметі хабарлады.
⠀
Кәсіпкер Махмут Мералиев пандемияның бірінші толқынындағы жағдайды ескере отырып, қолжетімді бағаға сатылатын маска жасап шығаруды қолға алған. Үкімет тарапынан қолдау тапқан бастаманың алғашқы өнімдері Тәуелсіздік күні қарсаңында сатылымға шығады.
⠀
– Бүгінде компанияда 20 жұмысшы қызмет етеді. Бір реттік маскаларымыз тоқылмаған материалдан жасалып, оны пайдалану уақыты 2 сағаттан аспайды. Үш қабатты ересектерге арналған медициналық бетперделерді жылына 30 млн. данамен шығаруды көздеп отырмыз, – деді зауыттың бас инженері Мұхтар Махметов.
⠀
Оның айтуынша, Атырауда тігілген бетперделер алдағы уақытта еліміздің барлық өңіріне сатылымға шығарылмақ. Сондай-ақ, компания балаларға арналған маскалар да шығаруды жоспарлап отыр.