Жарақат бөліміне хабарласушылар көбейді

Атырау облыстық денсаулық сақтау басқармасының баспасөз қызметінің мәліметінше, бүгін түске дейінгі аралықта облыстық аурухананың жарақат пунктіне мұзға тайып құлап, жарақат алған 20 адам жеткізілді.

Аурухананың травматология бөлімшесінің меңгерушісі Асхат Бисенғалиевтің айтуынша, жарақат алып жүгінгендер саны өңірде бір ғана травматология бөлімі болғандықтан артып отыр.
– Көктайғақ кеше басталғанына қарамастан бүгінгі күні жарақат бөліміне хабарласқан тұрғындар саны көбейді. Кеше, яғни 28 желтоқсан күні дене жарақатымен келгендер саны – 20 болса, бүгін таңертеңгі сағат 8:00-ден түскі 12:00-ге дейінгі аралықта бөлімшеге 20 адам хабарласты. Оның  ішінде екі адамның бас, қабырға сүйектеріне жол көлік апаты салдарынан зақым келсе, тағы екі тұрғынның тайып құлағаннан иығы шығып кеткен. Қазір олардың төртеуі де жедел түрде ауруханаға жатқызылып, ем қабылдауда. Жағдайлары орташа ауыр дәрежеде деп бағалануда, – деді Асхат Бисенғалиев.

Айта кетейік, Атырау облыстық аурухананың жарақат пунктіне хабарласқандардың жас  ерекешелігі әртүрлі. Оның ішінде жасөспірімдерден бастап жасы егде тартқан үлкен кісілер де бар. Аурухананың травматология бөлімі  тұрғындарға тәулік бойына қызмет көрсетеді.