Асыл тұқымды мал саны артуда
Атырау облысының әкімі Махамбет Досмұхамбетов Қызылқоға ауданындағы жұмыс сапары аясында «Қасым» және «Аян» шаруа қожалықтарының жұмысымен де танысты.
Аймақ басшысы алдымен «Қасым» шаруа қожалығына барды. 2015 жылы құрылған қожалық мал шаруашылығы, мал азығын дайындаумен айналысып келеді.
15 мың гектар жер көлемін алып жатқан қожалық бүгінде он адамды жұмыспен қамтып отыр. Жылына 7 тонна ет өндіріп, 800 тонна мал азығын дайындап отырған қожалықта 143 мүйізді ірі қара, 78 жылқы, 1 352 қой бар.
«Қасым» шаруа қожалығының төрағасы Гүлзина Құдабаева шаруа қожалығының экономикалық бағытын әртараптандырып, болашақта қаймақ, құрт, ірімшік және сиыр сүтін өндіріп сату бағытында жұмыстар жасалып жатқанын айтты.
Мұнан соң өңір басшысы «Аян» шаруа қожалығын аралап көрді. 2016 жылы құрылған қожалықтың иелігінде 1 400 гектар жер бар.
«Аян» шаруа қожалығының иесі Әнуар Аманғалидің айтуынша, мал басы жыл санап артуда.
– 2017 жылы Қостанай облысынан 50 бас асыл тұқымды абердин-ангусс қашарын алып келдік. Арада екі жыл өткенде алғашқы төлдерін алдық. Қазіргі уақытта етті бағытта асыл тұқымды 120 бас сиыр бар.
Тамыз айында Ақтөбеден биязы жүнді қойдың 300 аналығын, 12 қошқар алып келдік. Біздің нәтижелерімізді көрген әріптестеріміздің арасында бүгінде Қызылқоға ауданы бойынша 5 шаруа қожалығы асыл тұқымды мал санын көбейту бойынша жұмыстар атқаруда, – дейді қожалық иесі Әнуар Аманғали.
Бүгінде шаруа қожалық меншігінде 151 ірі қара мал, 517 қой-ешкі мен 28 жылқы бар.
Жергілікті шаруалармен кездесіп, жұмыс барысымен танысып шыққан облыс әкімі асыл тұқымды мал басын арттыруды және жұмысты одан ары жандандыру керектігін атап өтті.
