Облыс әкімі Индер ауданына сапарлады
Атырау облысының әкімі Махамбет Досмұхамбетов Индер ауданына барып, ауыл шаруашылығы, тұрғын үй құрылыстары мен елдімекендерді асфальттау жұмыстарының барысымен танысты. Бұл туралы әкімдіктің баспасөз қызметі хабарлады.
Көктоғай, Елтай, Қызылжар, Ақтан елдімекендерінде ауылішілік автокөлік жолдары мен жаяу жүргіншілер жолдарын асфальттау жұмыстары қарқынды жүргізілуде.
Көктоғай ауылындағы жол жөндеу жұмыстары мамырда басталған. Мұнда 12,9 шақырым жол төселіп, 2021 жылдың ақпан айында аяқталады деп жоспарлануда. Жүргізілген жұмыстар 276 адамды қызметке орналастыруға мүмкіндік берді және олардың 138-і жұмыспен қамту орталығы арқылы келген.
Облыс басшысы Индер ауданының әкімі Мейірім Калауиға жүргізіліп жатқан жұмыстардың сапасын қадағалауды және барынша жергілікті кадрларды пайдалануды тапсырды.
– Бұл жұмыстар «Жұмыспен қамтудың жол картасы» мемлекеттік бағдарламасына сәйкес жүзеге асырылуда. Сондықтан, жергілікті кадрларды жұмылдыру қажет. Қазіргі уақытта Теңіз кенішіндегі кейбір аса маңызды емес жұмыстардың уақытша тоқтатылуына байланысты біраз адам аудандарға қайтып оралды. Міне сол азаматтардың тәжірбиесін пайдалану қажет. Осылайша халықты жаңа жұмыс орындарымен қамтамасыз ету мәселелерін шешіп отырамыз. Тұрақты жұмыс орындарын ашу — басты мақсат болу керек, – деді Махамбет Досмұхамбетов.
Дәл осындай жұмыстар Елтай елдімекенінде де іске асырылуда, мұндағы жол жұмыстарына 382 адам тартылған, оның ішінде 194-і жұмыспен қамту орталығы арқылы жұмысқа орналастырылған азаматтар.
Индер ауданының әкімі Мейірім Қалауидің айтуынша, шалғай орналасқан Қызылжар мен Ақтан елдімекендеріне жол салу – аудан орталығымен жедел қатынас мәселесін шешуге әсіресе оқушыларды оқу орындарына тасымалдауға және шұғыл қызметтердің келуіне мүмкіндік береді.
Бұдан бөлек, өңір басшысы Махамбет Досмұхамбетов Аққала ауылында биыл пайдалануға берілген фелдшерлік-акушерлік пункттің жұмысымен танысты.
Сонымен қатар, жуық арада аудан орталығында ауыл шаруашылығы колледжі жатақханасының жаңа ғимараты пайдалануға берілмек. Нысанның құрылысы толығымен аяқталған. Қазіргі уақытта асханаға қажетті құрылғылар, жиһаз және басқа да қажеттіліктер үшін ішкі жабдықтар орнатылуда. 100 орындық жатақханада студенттер ғана емес, колледж оқытушылары да тұрады.
Сондай-ақ, Индер ауданы үшін тұрғын үй құрылысы да басым бағыттардың бірі саналады. Бүгінде Индер ауданында 4 үйдің құрылыс жұмыстары жүргізілуде. Оларды аяқтау мен тапсыруды 2021 жылға жоспарлаған.
Облыс әкімі аудан орталығындағы супермаркеттердің бірінде болып, тұрақтандыру қорымен реттелетін азық-түлік бағасын тексеріп шыққан соң, «Слава» шаруа қожалығының алқаптарын да аралады. Фермерлер 75 гектар жерге көкөніс пен бақша дақылдарын отырғызып, жергілікті халық пен облыс тұрғындарын өз өнімдерімен қамтамасыз етуде.
Аймақ басшысы Махамбет Досмұхамбетов Индер ауданына жұмыс сапары соңында жаңа жобаларды жүзеге асыру жұмыстарын жандандыруды, сондай-ақ, аудан әкіміне туризм саласындағы жобаларды іске асыруға қажетті жағдай жасап, өнеркәсіп өнімдерінің көлемін ұлғайту мен шағын және орта бизнесті дамыту мәселелерін шешуді тапсырды.
