Үйден шығуға тыйым салынды
Атыраулықтарға сағат 23:00-ден кейін үйлерінен шығуға тыйым салынды. Бұл туралы Өңірлік коммуникациялар қызметінің баспасөз орталығында өткен онлайн брифингте Атырау облысының тауарлар мен көрсетілетін қызметтердің сапасы мен қауіпсіздігін бақылау басқармасы басшысының орынбасары Сүлеймен Әубәкіров мәлімдеді.
Нақтырақ айтқанда, Атырау облысының аумағында 5-шілде күнінен бастап 19-шілдеге дейін 23:00—06:00 сағат аралығында шектеу шаралары енгізілді.
— Облыстың Бас мемлекеттік санитарлық дәрігерінің қаулысына сәйкес, тұрғындардың қозғалысына шектеу қойылады. Алайда, азаматтардың тұрғылықты жерінен жұмыс орнына баруға және кері қайтуларына тыйым салынбайды. Тек бұл жағдайда олардың жұмыс орнынан берілген анықтама немесе қызметтік куәлігі өздерімен бірге болуы керек. Сондай-ақ, азық-түлік өнімдерін, қажетті тауарларды, дәрі-дәрмектерді тұрғылықты жеріне жақын орналасқан дүкендер мен дәріханалардан сатып алуға, төтенше жағдайлар туындаған кезде медициналық мекемелерге баруға рұқсат етіледі, — деді Сүлеймен Әубәкіров.
