Ақтөбеде үш қыз суға батып кетті
Ақтөбе обоысының Әйтеке би ауданында 10, 12 және 16 жастағы үш қыз суға батып кетті. Бұл туралы облыстың төтенше жағдайлар департаментінің баспасөз қызметі мәлімдеді.
Кеше сағат 16:45-те құтқару қызметіне Әйтеке би ауданы Аралтоғай ауылынан 3 шақырым қашықтықтағы Ырғыз өзеніне 3 жасөспірім қыздың суға батып кеткені туралы хабарлама түсті. Олар тыйым салынған жерге шомылған. Оқиға орнында куәгерлер 2007 және 2011 жылғы туған қыздардың денесін судан алып шықты.
«2013 жылы туған қыз баланың денесін жедел құтқару жасағының құтқарушылары сағат 21:32-де жағадан 10 метр қашықтықта 6 метр тереңдіктен шығарды. Болжам бойынша 2007, 2011 және 2013 жылы туған 3 қыздың екеуі – Әйтеке би ауданының тұрғындары, үшіншісі Ырғыз ауданынан сол ауылға қонаққа барған. Суға шомылу кезінде бір қыз баланың анасы олардың жанында болған» делінген хабарламада.
Ақтөбе облыстық білім басқармасының басшысы Жайық Сұлтанның хабарлауынша, олар – бір үйдің балалары емес.
