Оқушыларға тағы 11 000 ноутбук таратылады

Бұл туралы Атырау облыстық білім беру басқармасы басшысының орынбасары Айнагүл Дүйсекенова онлайн брифингте хабарлады.
– Пандемия кезінде 24 730 оқушы планшет, ноутбук сияқты компьютерлік технологиялармен қамтылды. Оның 19 072-сі – ауылдық елдімекеннің аз қамтылған, көпбалалы отбасынан шыққан оқушылар. Сондай-ақ, 3 000 интернет роутер сатып алынып, қажеттілігі бар оқушыларға таратылды. Қарашаның 10-ына дейін тағы 11 000 ноутбук келеді. Олар да білім беру ұйымдарына жіберіліп, қажет ететін оқушыларға үлестіріледі, – деді Айнагүл Дүйсекенова.
Оның мәліметіше, бүгінде облыс бойынша 1 – 4 сыныптар арасындағы оқушылардың 24 831-і кезекші сыныптарда білім алуда. Ал мектепке дейінгі білім беру ұйымдарына 13 200 тәрбиеленуші барып жүр.
Барлық білім беру ұйымдарындағы қауіпсіздік пен карантиндік талаптардың орындалуын жергілікті атқарушы органдар мен білім беру басқармасы жанынан құрылған мобильдік топ кестеге сай тексеруде.