Ең жоғарғы жалақыны қай қызметтегілер алатыны белгілі болды
Биыл Қазақстандағы ұйымдар басшыларының орташа айлық жалақысының мөлшері жылына 518,3 мың теңге болды. Бұл туралы Ranking.kz хабарлады.
Бұл ретте, экономика салалары бойынша айтарлықтай айырмашылық байқалады.
Мысалы, қонақүй және тамақтану бойынша қызмет көрсететін салалардағы ұйымдардың жетекшілері барлығынан жоғары табыс табады – 1,8 миллион теңге.
Жоғары жалақысы бойынша ТОП-үштікке енгендердің ішінде тау-кен өндірісі кәсіпорындарының – 1,3 миллион теңге, сондай-ақ, қаржылық және сақтандыру қызметінің – 1,1 миллион теңге басшылары бар.
Ең төменгі жалақыны әлеуметтік маңызы бар кәсіпорындардың жетекшілері алады. Олар –мемлекеттік басқару, қорғаныс және міндетті әлеуметтік қамсыздандыру кәсіпорындарының – 271,8 мың теңге, сондай-ақ, денсаулық сақтау – 280,3 мың теңге және білім беру – 323,6 мың теңге салаларындағы кәсіпорындардың басшылары.
Аймақтардағы ұйымдардың басшылары алатын ең жоғары орташа айлық жалақы Атырау облысында – 876,6 мың теңге, сондай-ақ, Алматы – 805,6 мың теңге мен Нұр-Сұлтанда – 638,6 мың теңге тіркелді.
Осы жылдың жазында еңбек нарығына жүргізілген зерттеу нәтижесі бойынша, Қазақстан бойынша қызметкерлерге есептелген жалақы мөлшері белгілі болды. Еліміздегі барлық жұмысшының алған орташа айлық жалақысы келесідей:
• 45 мың теңгеге дейін — жұмысшылардың 1,8%-ы;
• 45 мыңнан 105 мың теңгеге дейін — 30,8%;
• 105 мыңнан 210 мың теңгеге дейін – 39,2%;
• 210 мыңнан 300 мың теңгеге дейін — 14,2%;
• 300 мыңнан 420 мың теңгеге дейін — 7,2%;
• 420 мыңнан 600 мың теңгеге дейін — 3,6%;
• 600 мыңнан 750 мың теңгеге дейін — 1,2%;
• 750 мыңнан 900 мың теңгеге дейін — 0,6%;
• 900 мың теңгеден жоғары — жұмысшылардың 1,4%-ы.
Басшылар мен мемлекеттік қызметкерлердің орташа айлық жалақы мөлшері шамамен – 354,5 мың теңге.
Өз кезегінде, кәсіби мамандар орташа есеппен 214,8 мың теңге, ал техника саласының қызметкерлері мен басқа да көмекші кәсіби мамандар 165,2 мың теңге мөлшерінде еңбекақы алады. Сонымен қатар, біліктілігі жоқ жұмысшылардың орташа айлық жалақысы 83,7 мың теңге болды.
