300-ге жуық шетелдік Атырауға «шатыр тікті»

Атырау облысында жыл басынан бері 300-ге жуық шетел азаматы Қазақстан Республикасында тұрақты тұруға рұқсат алды. Бұл туралы облыстық полиция департаменті хабарлады.
Департамент баспасөз қызметінің мәліметіне сүйенсек, Атырау облысына келіп, тұрақты тұруға өтінім бергендердің арасында ТМД елдерінің азаматтарымен бірге, Ұлыбритания, Италия, Үндістан, Түркия секілді шет мемлекеттердің өкілдері де бар.
Олар отбасы жағдайына байланысты Қазақстанда тұруға рұқсат алуға шешім қабылдап, көші-қон полициясына тиісті өтінішпен жүгінеді.
Соның бірі – Өзбекстан Республикасының азаматы Бақыт Естемірова. Ол Қазақстанда тұрақты тұру үшін көші-қон полициясына құжат тапсырған.
– Өткен жылдың қазан айында Өзбекстандағы есептен шығып, кәмелетке толмаған қызыммен Қазақстанға келдім. Менің күйеуім осында тұрады. Бірден тұрақты тұруға рұқсат алу үшін өтініш бердім. Құжат рәсімдеуге көші-қон полициясы көмектесті. Мамандар рәсімдеу процедурасын егжей-тегжейлі түсіндірді. Өтінішімді кідіріссіз қабылдады. Тұрақты тұруға рұқсат алдым. Енді Қазақстан Республикасының азаматтығын алу үшін құжат жинақтап жүрмін, – дейді Бақыт Естемірова.