Н.Ноғаев Ресейдегі Құрманғазы атындағы орталыққа барды
Атырау облысы әкімі Нұрлан Ноғаев Астрахан облысының Алтынжар ауылында орналасқан Құрманғазы атындағы өңірлік мәдени орталығында болды. Бұл туралы облыс әкімдігінің әлеуметтік желідегі ресми парақашасы хабар таратты.
2005 жылы салынып, былтыр жөндеуден өткен атақты күйші, композитор Құрманғазы Сағырбайұлы атындағы орталық көршілес облыстың айтулы мәдениет ошағына айналып отыр. Бұл жерде Құрманғазының кесенесі мен музейі орналасқан. Туристер үшін қонақ үй де бар.
«Құрманғазы» өңірлік мәдени орталығында 40-қа жуық адам жұмыс жасайды. Олардың 25-і – домбырашылар, «Белый город» орыс музыкалық ансамблі мен «Самал» қазақ музыкалық ансамблінің әншілері.
Атырау облысы әкімі Нұрлан Ноғаев кесене мен музейде болып, ұлы күйшінің шығармашылығы мен өмірі туралы сыр шертетін экспонаттармен танысты.
«Бізге жыл сайын 1000-ға жуық адам келеді. Құрманғазы Сағырбайұлының кезіндегі қазақтардың өмірі туралы оларға мағлұмат береміз. Атырау облысы әкімдігінің және облыстың жанашыр азаматтарының қолдауымен 2018 жылдың аяғында мәдени орталыққа күрделі жөндеу жасадық. Соның арқасында орталықтың қызметі тың серпін алды. Осындай қолдауы үшін Атырау облысының халқына ризашылығымызды білдіреміз» деді Құрманғазы атындағы өңірлік мәдени орталықтың директоры Амангелді Әбілғазиев.
