«АДАЛ» партиясы несие мәселесін шешудің жолын айтты

«АДАЛ» саяси партиясынан Мәжіліс депутаттығына кандидат Эльдар Жұмағазиев партияның сайлауалды бағдарламасының әлеуметтік блогы туралы айтты.
Оның айтуынша, тұрғындармен аймақтық кездесулер кезінде ауыл мен қала тұрғындарының жиі көтерген мәселесі – мерзімі өткен несие.
– Сарапшылардың бағалауы бойынша 1,5 миллионнан астам қазақстандықтың несие бойынша кешіккен берешегі бар. Бұған пандемияның да әсері бар. Тіпті салыстырмалы түрде төлем қабілеті бар адамдардың өзіне де несие төлеуде қиындық тууда. Алайда біз жалпы несиелік амнистияға қарсымыз, – деді ол.
Эльдар Жұмағазиев проблеманы шешудің мұндай тетігі банк жүйесінің қаржылық тұрақтылығына әсер етеді деп түсіндірді.
– Банктерді қаржыландырудың негізгі көзі депозиттер болып табылады. Олардың банк секторы міндеттемелерінің құрылымындағы үлесі – 78 пайыз. Несиелік рақымшылық банктердің салымшылар мен басқа клиенттер алдындағы міндеттемелерін орындау мүмкіндігінен айырып, қауіп төндіреді, – деп түсіндірді ол.
Несиелік рақымшылықтың орнына, партия жеке тұлғалардың банкроттық институтын енгізу арқылы мәселені жүйелі түрде шешуді ұсынады.
– Әркімнің қарызына заңды түрде кешірім алып, жаңа өмір бастауға құқығы бар. Әрине азамат банкроттыққа жүгінер және несиесін қайта құрылымдау керек болған кезде заңнамада бекітілген істердің нақты және түсінікті тізбесі болуы қажет, – деді Эльдар Жұмағазиев.
Ол партия қазіргі жағдайда мемлекет қиын өмірлік жағдайға тап болған азаматтарды қолдау бағдарламаларын жүзеге асыруы керек деп санайды деп баса айтты.
– Мысалы, отбасының асыраушысы ауруға шалдығып, отбасы іс жүзінде күн көріссіз қалды, ал қарыз алушының барлық растайтын құжаттары бар. Бұл жағдайда қолдау бағдарламасы несие ауыртпалығын жеңілдетіп, төлемдерді кешіктіруі керек, – деп түсіндірді депутаттыққа үміткер.
Эльдар Жұмағазиев мұндай жүйелер кейбір елдерде жұмыс істейтінін айтты. Мысалы, Ресей федералдық бағдарламалардың жобаларын қарастырады. Бағдарламаға сәйкес қаржылық жағдайы қиын қарыз алушылардың жекелеген санаттары қарыздың 30 пайызына дейін есептен шығара алады.
– Мұндай қарыз алушылар: ардагерлер, қамқоршылар, кәмелетке толмаған мүгедектердің ата-аналары, мүгедектердің өздері және кәмелетке толмағандарға немесе 24 жасқа толмаған күндізгі оқуда оқитын студент, – деді ол.