Ұлттық құрамаға спортшы дайындауда Атырау облысы – соңғы орындарда
Астанада Туризм және спорт министрі Ермек Маржықпаевтың қатысуымен дене шынықтыру және спорт саласындағы проблемалық мәселелер және ел спортшыларының Парижде өтетін XXXIII жазғы Олимпиадаға дайындық бойынша кеңейтілген алқалы отырыс өтті, деп хабарлайды БАТЫС.ИНФО.
Басқосуға өңірлік дене шынықтыру және спорт басқармаларының басшылары, Ұлттық Олимпиада комитетінің, республикалық федерация өкілдері, ұлттық құрама командалардың бас жаттықтырушылары, олимпиадалық спорт түрлері бойынша Мемлекеттік жаттықтырушылары және министрліктің бағынысты ұйымдардың басшылары қатысты.
Жиын барысында қатысушылар күн тәртібінде тұрған бес мәселе төңірегінде өз ойларын ортаға салып, пікір алмасты. Атап айтқанда, отырысқа қатысушылар спорт түрлері бойынша ұлттық құрама команда спортшыларының лицензиялық жарыстарға және 2024 жылы Парижде өтетін жазғы Олимпиадаға дайындық барысын, Қазақстанда спорттық медицинаны дамытудың өзекті мәселелерін, Спорттағы допингке қарсы бағдарлама, Спорт резервін және жоғары дәрежелі спортшыларды даярлау жүйесін және саланы дамытудың негізгі міндеттерін айқындауды талқылады.
Сонымен қатар, өңірлік дене шынықтыру және спорт басқармаларының басшылары мен ұлттық құрама командалардың бас жаттықтырушылары атқарып жатқан істері туралы баяндама жасап, алдағы жоспарларын ортаға салды.
Министр ұлттық құрама нәтижелері төмендеп кетуінің басты себебі ретінде – бәсекелестік пен ұрпақтар сабақтастығының болмауы екенін атап өтті. Сондай-ақ, өңірде жас спортшыларды даярлау бойынша мәселелер бар екенін жеткізді. Ұлттық құрамаға спортшылар жеткізіп беру жағынан ең төмен үлес Солтүстік Қазақстан (23,9%, спорттың 11 түрі бойынша 95 спортшы), Атырау (26,1%, спорттың 12 түрі бойынша 59 адам) және Ақтөбе облыстарына (28,3%, спорттың 13 түрі бойынша 73 адам) тиесілі.
Сондай-ақ, Ермек Маржықпаев сала қызметкерлерін әлеуметтік қолдау мәселелері әрқашан басты назарда болатынын және білікті кадрлардың болуы жоғары спорттық нәтижелерге қол жеткізудің негізгі факторы екенін айтты.
Қазіргі таңда елімізде 180 спорт түрі бар. Оның тек 59-ы ғана халықаралық олимпиада комитеті тарапынан мойындалған. Оның ішінде 46-сы жазғы олимпиада, 13-ші қысқы Олимпиада, 67-і Олимпиадалық емес, 11-і ұлттық, 17-сі Сурдлимпиада, 18-і Паралимпиада, 8-і Паралимпиадалық емес.
– Негізгі орта мерзімді міндеттеріміздің бірі – спорт түрлеріне басымдық беру. Тәуелсіздік жылдарында Қазақстан құрамасының спортшылары жазғы олимпиадалық 46 спорттың тек 13 түрінен ғана Олимпиада жүлдесіне қол жеткізді. Әлем чемпионаттарында да жағдай осындай. Тұрақты нәтижелерді тек санулы спорт түрлері ғана көрсетіп жүр. Осыған байланысты министрлік мемлекеттік бюджеттен қаржыландырылатын спорт түрлерін тек тірек және медаль қажет ететін спорт түрлеріне басымдық бере отырып, кезең-кезеңімен қысқартады, – деді Ермек Маржықпаев.
