Атыраулықтар «сасық сайдан» құтылатын болды
Атырауда жаңа кәріз-тазарту кешенінің құрылысы 2020 жылдың қыркүйегінде аяқталады деп жоспарлануда. Бұл туралы Атырау облысы әкімдігінің әлеуметтік желідегі ресми парақшасы хабар таратты.
Атырау облысы әкімінің бірінші орынбасары Нұрлан Таубаев қаланың сол жақ жағалау бөлігіне арналған кәріздік тазарту кешенінің (КТК) құрылыс барысымен танысты. Бүгінде нысан бойынша негізгі құрылыс-монтаж жұмыстары аяқталды, ендігі кезекте технологиялық жабдықтарды орнату, монтаждау және кешенді іске қосу жұмыстары жүргізілуде.
Жұмыстарды толық аяқтау және нысанды пайдалануға беру 2020 жылдың қыркүйек айына жоспарланған. Еске сала кетейік, нысанның құрылысы 2017 жылдың қараша айында басталды. Аталған кешен бас канализациялық станса мен тазарту алаңдары, тазартылмаған және тазартылған ағындардың қысым коллекторы, сондай-ақ биологиялық тоғандар мен булану алқаптарының алаңын қамтиды. Мұндай тазарту жүйесі Қазақстанның бірнеше қалаларында ғана қолданылады.
Жаңа кәріз суын тазарту стансасы іске қосылғаннан кейін бірнеше жыл бойы қала тұрғындарының тарапынан шағым тудырып келген «сасық сай» алаңы жабылатын болады. Сарқынды су ағыны булану алқабына түспес бұрын, кәріз-тазарту стансасының көмегімен толық тазартылады. Сонымен қатар, кәріз суларымен бірге жер асты сулары, топырақ және ауа тазартылатын болады.
